Histeroskopik Prosedurlar

Histeroskopiya müasir ginekologiyada həm diaqnostik, həm də müalicə məqsədilə geniş tətbiq olunan minimal invaziv üsuldur. Bu metod uşaqlıq daxilini (endometrium) birbaşa görməyə və ehtiyac olduqda eyni seansda müdaxilə etməyə imkan verir. Bonum Medical klinikasında bu prosedur peşəkar həkimlər və yüksək texnoloji avadanlıqlar vasitəsilə həyata keçirilir.

Histeroskopik prosedurlar menstrual nizamsızlıqların səbəblərinin araşdırılması, uşaqlıq daxili poliplərin, miyomların çıxarılması, sonsuzluq səbəblərinin öyrənilməsi, abort sonrası qalıq toxumaların təmizlənməsi və təkrar düşüklərin araşdırılması kimi hallarda tətbiq olunur. Bu üsul həm də əvvəlki ultrasəs müayinələrində aşkarlanan anomaliyaların daha aydın şəkildə təhlilinə və dəqiqləşdirilməsinə xidmət edir.

Histeroskopiya proseduru steril əməliyyatxana şəraitində, adətən qısa müddətli anesteziya altında aparılır. Cihazın ucu incə və elastik olduğundan uşaqlıq boynundan uşaqlıq boşluğuna travma yaratmadan daxil olur. Endoskopik kamera vasitəsilə uşaqlıq daxili boşluq real zamanlı izlənilir və hər hansı patoloji dəyişiklik müşahidə edilərsə, eyni anda müdaxilə edilir. Bu, pasiyentin əlavə əməliyyatlardan azad olması və prosedurun effektliyini artırır.

Histeroskopiyanın ən böyük üstünlüklərindən biri, kəsiksiz və qanaxmasız olmasıdır. Pasiyent əməliyyatdan bir neçə saat sonra evə buraxılır və adətən bir neçə gün ərzində normal həyatına qayıda bilir. Əldə edilən görüntülər arxivləşdirilərək, ginekoloji problemlərin dinamik izlənməsi və müalicə planlaması üçün istifadə edilir.

Bonum Medical fərqi

Bonum Medical klinikasında histeroskopik prosedurlar ən müasir cihazlarla, steril və komfortlu əməliyyatxana şəraitində icra olunur. Bakıdan dəvət olunan ixtisaslı ginekoloqların iştirakı, peşəkar anesteziya dəstəyi və individuala uyğunlaşdırılmış yanaşma prosedurun uğurlu və pasiyent üçün minimum narahatlıqla keçməsini təmin edir.

Kardiotokoqrafiya (KTG və ya NSD)

Kardiotokoqrafiya (KTG və ya NSD) – Ana bətnində dölün vəziyyətinə real zamanlı nəzarət

Kardiotokoqrafiya – tibbi ədəbiyyatda KTG və ya NSD kimi tanınan bu müayinə – hamiləlik dövründə ana bətnindəki körpənin ürək döyüntülərini və uşaqlıq yığılmalarını eyni anda izləməyə imkan verən qeyri-invaziv və təhlükəsiz diaqnostik üsuldur. Bu müayinə Bonum Medical klinikasında ən müasir texnologiya ilə həyata keçirilir və həm həkimlərə, həm də valideynlərə körpənin rifahı haqqında dəqiq məlumat verir.

Kardiotokoqrafiya müayinəsi zamanı iki əsas parametr qeydə alınır:

1. Dölün ürək döyüntüləri – körpənin ürəyinin sabit və normal intervalda döyünüb-döyünmədiyi, stresə necə reaksiya verdiyi izlənir.

2. Uşaqlıq yığılmaları (kontraksiyalar) – hamiləlik və doğuş zamanı uşaqlığın necə hərəkət etdiyi qiymətləndirilir.

KTG xüsusilə hamiləliyin son trimestrində, doğuşa yaxın zamanlarda, təxirə salınmış və ya riskli hamiləliklərdə, həmçinin döl hərəkətlərinin zəiflədiyi hallarda tətbiq olunur.

KTG müayinəsi pasiyentin arxası üstə və ya yarımoturaq vəziyyətdə uzanması ilə həyata keçirilir. Qarın üzərinə iki sensor yerləşdirilir – biri dölün ürək döyüntüsünü, digəri isə uşaqlıq yığılmalarını qeyd edir. Müayinə 20-30 dəqiqə davam edir, bəzən döl hərəkətlərinin azlığı səbəbilə müddət uzadıla bilər. Bu müddət ərzində cihaz vasitəsilə əldə edilən məlumatlar kağız lentə yazılır və həkim tərəfindən təhlil olunur.

KTG müayinəsi dölün oksigenlə təchizatının, sinir sistemi fəaliyyətinin, ana bətnində stressə reaksiyasının qiymətləndirilməsi baxımından olduqca əhəmiyyətlidir. Bu müayinə sayəsində erkən mərhələdə problem aşkarlanarsa, doğuş strategiyası yenidən planlaşdırıla bilər.Əldə edilən nəticələr doğum vaxtının dəqiqləşdirilməsi, təcili tibbi müdaxiləyə ehtiyacın olub-olmaması barədə qərar verməkdə əsaslı rol oynayır.KTG, hamiləliyin 32-ci həftəsindən etibarən aparıla bilər. Lakin xüsusi risk daşıyan hallarda (məsələn, yüksək riskli hamiləlik, döl hərəkətlərində zəifləmə, hipertoniya, şəkərli diabet, döldə inkişaf geriliyi və s.) 28-ci həftədən etibarən də tətbiq oluna bilər. Adətən doğuma yaxın 36–40-cı həftələrdə isə bu müayinənin tezliyi artır:

• Sağlam və normal keçən hamiləliklərdə: Hər 7–10 gündə bir aparıla bilər.

• Riskli hamiləliklərdə və ya ananın klinik vəziyyətində dəyişiklik olduqda: Daha qısa intervallarla – hətta hər 2–3 gündə bir və ya gündəlik KTG nəzarəti tövsiyə oluna bilər.

• Doğuş başladıqdan sonra isə KTG vasitəsilə doğum boyunca dölün vəziyyəti davamlı olaraq izlənir.

Bonum Medical klinikasında KTG müayinəsinin üstünlükləri

Bonum Medical klinikasında KTG proseduru ən müasir avadanlıq vasitəsilə aparılır. Müayinələr steril və rahat şəraitdə, peşəkar ginekoloq nəzarətində, ana və körpənin təhlükəsizliyi tam təmin olunaraq icra edilir. Xüsusilə bölgədə mövcud olmayan bu tip texniki imkanlar sayəsində hamilələrimiz Bakıya getmədən də yüksək səviyyəli nəzarət və xidmət alırlar.

Kolposkopiya

Kolposkopiya – Uşaqlıq boynunun dəqiq və ağrısız vizual müayinəsi

Kolposkopiya – uşaqlıq boynunun (serviksin), vagina divarlarının və xarici cinsiyyət orqanlarının genişlənmiş şəkildə vizual müayinəsinə imkan verən xüsusi optik cihaz (kolposkop) vasitəsilə aparılan ağrısız və yüksək dəqiqlikli diaqnostik prosedurdur. Bu üsul servikal displazi, HPV infeksiyası, uşaqlıq boynunda iltihabi və ya onkoloji dəyişikliklər, eroziyalar və şübhəli sitoloji nəticələr zamanı tətbiq edilir.

Bonum Medical klinikasında kolposkopiya ən müasir avadanlıq, steril mühit və peşəkar ginekoloqların nəzarəti ilə həyata keçirilir.

Bu müayinə əsasən aşağıdakı hallarda aparılır:

• PAP-smear analizində (sitoloji yaxmada) şübhəli və ya qeyri-normal nəticə olduqda;

• Uşaqlıq boynunda eroziya və ya yara müşahidə edildikdə;

• HPV infeksiyası (xüsusilə yüksək riskli ştamlar) aşkarlandıqda;

• Qanlı ifrazat, cinsi əlaqə sonrası qanama və ya uzunmüddətli axıntı hallarında;

• İnfeksiya, yanma, ağrı və ya digər ginekoloji narahatlıqlar fonunda servikal dəyişiklik şübhəsi olduqda.

Prosedur hamiləlik dövründə bəzi göstərişlərlə ehtiyatla aparıla bilər, lakin adətən doğuşdan sonrakı dövrdə tövsiyə olunur.

Kolposkopiya müayinəsi ginekoloji kresloda, adi ginekoloji baxış prosedurlarına bənzər şəkildə keçirilir. İlk olaraq uşaqlıq boynu kolposkop vasitəsilə 10–40 dəfə böyüdülmüş şəkildə müşahidə olunur. Sonra xüsusi məhlullarla (əsasən sirkə turşusu və Lugol məhlulu) serviks səthi işlənir. Bu zaman anormal hüceyrə dəyişiklikləri aydın şəkildə görünə bilir.

Əgər şübhəli nahiyə aşkar olunarsa, kolposkopik yönümlü biopsiya götürülə bilər – yəni həmin hissədən kiçik toxuma nümunəsi alınaraq laborator müayinəyə göndərilir.

Müayinə təxminən 15–20 dəqiqə davam edir, ağrısızdır və xüsusi anesteziya tələb etmir.

Əgər prosedur yalnız müşahidə ilə aparılıbsa, pasiyent dərhal gündəlik fəaliyyətinə qayıda bilər. Biopsiya aparılmışsa, az miqdarda qanlı axıntı və ya narahatlıq hissi ola bilər ki, bu da 1–2 gün ərzində keçir.

Biopsiya nəticələri hazır olduqdan sonra (adətən 7–10 gün ərzində), həkim son diaqnozu müəyyən edir və fərdi müalicə planını hazırlayır.

Bonum Medical klinikasında kolposkopiyanın üstünlükləri

Bonum Medical klinikasında kolposkopik müayinə aşağıdakı üstünlüklərlə həyata keçirilir:

• Müasir kolposkopik cihaz

• Yüksək ixtisaslı qadın sağlamlığı üzrə ixtisaslaşmış ginekoloqlar;

• Tam steril və komfortlu mühitdə prosedur;

• Biopsiyanın ehtiyac olduğu halda yerində götürülməsi və laborator təhlilə göndərilməsi;

• Sürətli nəticələr və düzgün müalicə istiqamətinin müəyyən edilməsi.

Histerosalpinqoqrafiya (HSQ / HSG)

Histerosalpinqoqrafiya (HSQ / HSG) – Uşaqlıq və boruların rentgen müayinəsi

Histerosalpinqoqrafiya (HSQ və ya HSG) – uşaqlığın (endometriumun) daxili boşluğu və uşaqlıq borularının keçiriciliyinin qiymətləndirilməsi üçün aparılan xüsusi rentgenoloji müayinə üsuludur. Bu müayinə qadın sonsuzluğunun səbəblərinin araşdırılmasında ən əsas və ilkin mərhələlərdən biri hesab olunur.

Prosedur zamanı uşaqlıq boşluğuna xüsusi rentgen kontrast maddəsi yeridilir və bu maddənin uşaqlıq borularından keçərək qarın boşluğuna axıb-axmadığı izlənilir. Əgər borular açıqdırsa, kontrast maddə sərbəst şəkildə axır və bu, rentgen görüntüsündə izlənilir. Bu isə boruların keçirici olduğunu və hamiləlik üçün uyğun şəraitin olduğunu göstərir.

Hansı hallarda HSQ müayinəsi aparılır?

• Sonsuzluq səbəblərinin araşdırılması – uşaqlıq borularının tutulmasının və ya funksional pozğunluğunun aşkarlanması üçün

• Abort və ya doğuş sonrası endometrial struktur dəyişikliklərinin qiymətləndirilməsi

• Uşaqlıq daxilində polip, mioma, yapışma (sinexiya) və ya anadangəlmə quruluş anomaliyalarının (septum, bikornuat və s.) müəyyənləşdirilməsi

• Əvvəlki cərrahi müdaxilələr sonrası – məsələn, boruların bağlanması əməliyyatından sonra vəziyyətin qiymətləndirilməsi üçün

Histerosalpinqoqrafiya adətən aybaşı bitdikdən 5–10 gün sonra (yəni ovulyasiyadan öncəki dövrdə) aparılır ki, hamiləlik ehtimalı istisna olunsun. Müayinə ambulator şəkildə, anesteziya tələb etmədən həyata keçirilir.

Pasiyent ginekoloji kresloda yerləşdirilir, uşaqlıq boynuna kiçik bir kateter yeridilir və xüsusi radiokontrast maddə yavaş şəkildə uşaqlığa verilərək rentgen aparatı vasitəsilə görüntülər alınır. Müddətcə prosedur 10–15 dəqiqə davam edir.

Müayinədən sonra az miqdarda qanlı axıntı və ya yüngül sancı tipli ağrılar hiss oluna bilər. Bu narahatlıqlar 1–2 gün ərzində keçici olur. Bəzən həkim yüngül ağrıkəsicilər və ya iltihabəleyhinə preparatlar təyin edə bilər.

Əgər kontrast maddənin uşaqlıq borularından keçmədiyi müəyyən olunarsa, boru tutulması və ya spazmı ehtimalı qoyulur. Yalnız təcrübəli radioloq və ginekoloq komandasının dəqiq təhlili ilə bu nəticələrin düzgün şərhi və müalicə istiqaməti müəyyən edilir.

Bonum Medical klinikasında HSQ-nin üstünlükləri

Bonum Medical klinikasında histerosalpinqoqrafiya müayinəsi aşağıdakı üstünlüklərlə icra olunur:

• Yüksək dəqiqlikli rəqəmsal rentgen cihazları ilə aparılan real vaxt görüntüləmə

• Steril və komfortlu mühitdə, peşəkar komandaların nəzarətində icra

• Təhlükəsiz, qısa müddətli və minimal narahatlıqla keçən prosedur

• Bölgədə nadir olaraq bu müayinənin mövcudluğu, Bakı səfərlərinə ehtiyacın olmaması

• Nəticələrin sürətli şəkildə verilməsi və pasiyentə uyğun fərdi müalicə planının hazırlanması

HSQ müayinəsi – sonsuzluğun səbəblərinin aşkarlanması və müalicəyə doğru doğru addım atmaq üçün vacib diaqnostik vasitədir. Ginekoloji müayinəyə ehtiyacınız varsa və ya hamilə qalmaqda çətinlik yaşayırsınızsa, bu prosedur klinikamızda təhlükəsiz, rahat və etibarlı şəkildə həyata keçirilə bilər.